Sa simula ng aking pakitang turo sa Altamarino Clasio High School ay nakaramdam ako ng kaba, kaba na baka hindi ko maibigay ng maayos ang mga kaalaman na kailangan nilang matutuhan saakin. Naging mahirap sa umpisa dahil kinukuha ko pa ang loob ng aking mag-aaral, dito ko mismong nasaksihan na iba’t iba ang ugali ng bawat isa sakanila. Kailangang mas maging bukas ka sa lahat ng bagay, simula sa dapat sensitibo ka rin sakanilang mga nararamdaman at kung paano tratuhin ng patas ang bawat mag-aaral. Sa bawat pasok ko sa paaralan mas ginaganahan akong magturo dahil nakikita ko sa mata ng aking mag-aaral na gusto at masaya silang matuto. Ang masabihan ng nauunawaan nila ang aralin dahil araw-araw may pagganyak at mas pinapadali ang mga bagay ay masarap sa pakiramdam, mas pinipilit kong galingan dahil may mga batang umaasa at natutuwa na makita kang magturo sa unahan ng apat na sulok ng silid aralan. Masaya at swerte rin na mabait ang aking mentor, nagagabayan at ibinibigay niya ang mga dapat kong matutuhan para maging isang epektibong guro. Sa kabuuan sobrang swerte ko na napunta sa magandang skwelahan na may mababait na guro at mag-aaral na hinayaan akong magbahagi ng kaalaman, magkamali, at matuto na rin sa pagtuturo.