Magsisimula ako sa unang araw na aking naitungtong ang mga paa sa lupa ng Altamarino-Clasio High School, sa mga oras na iyon ay naramdaman ko ang iba’t ibang emosyon—takot, kaba, pananabik, at ligaya. Nangingibabaw ang takot sapagkat tila ako ay sasabak sa isang digmaan na hindi ko alam ang wakas kung ito ay aking mapagtatagumpayan. Mga bagong mukha, paligid, ibang-iba sa aking nakasanayang paaralan. Hindi ganap ang aking tiwala sa sarili kaya may halong kaba na baka ako ay mabigo. Gayunpaman ako ay nasasabik dahil ito ay isang malaking hamon na kapag nalampasan ay naghihintay ang matamis na tagumpay. Masaya, dahil ipinagkatiwala sa akin ang mga mag-aaral na naghihintay na sila ay mabahaginan ng kaalaman tungkol sa wikang Filipino. Labis ang aking pasasalamat sa lahat ng mga taong nagsilbing gabay, kaibigan, at guro mula sa CBSUA at ACHS dahil ang kanilang mga iminungkahi na iba’t ibang estratehiya ay aking ginamit at masasabi ko na malaking tulong ang mga ito upang maipakita ang epektibong pagtuturo.